Severino Escurís Batalla, presidente honorífico de ACTEMSA, cumpre cen anos este 18 de xullo: un século de vida adicado literalmente ao traballo e ao progreso económico empresarial da súa comarca (O Barbanza) e da súa vila, A Pobra do Caramiñal.
En palabras do empresariado do Barbanza e da Pobra (AEPuebla), estamos “ante unha vida extraordinaria adicada ao traballo, a empresa e a familia, como empresario modélico e referente no impulso económico do Barbanza e todo un referente para as novas xeracións de emprendedores”. Así definiron a súa traxectoria na patronal local (AEPuebla) e no Concello da Pobra na recente homenaxe ao mérito empresarial de Severino Escurís, celebrada o pasado 4 de xullo.
O empresario celebra o seu aniversario hoxe en compañía de toda a súa familia, coa que creou ACTEMSA en 1994, unha operadora global de túnidos e peixe conxelado que foi pioneira do Polígono dA Tomada, á que segue acudindo a diario; despois de toda unha vida en Escurís, compañía fundada polo seu pai Manuel.
Na súa longa traxectoria, xerou miles de empregos directos e indirectos e contribuíu ao desenvolvemento do sector pesqueiro e conserveiro de Galicia, onde sempre ostentou unha posición de liderado empresarial.
Traxectoria dun empresario centenario
Don Severino Escurís naceu o 18 de xullo de 1925 en Rianxo e trasladouse á Pobra do Caramiñal aos catorce anos; incorporándose á conserveira Escurís recentemente fundada polo seu pai aos dezasete anos. Foi nomeado como presidente do consello de administración en 1979 e ao xubilarse crea ACTEMSA cos seus fillos en 1994 aos 69 anos, inaugurando o polígono da Tomada en Pobra do Caramiñal.
Recibiu os recoñecementos do Goberno de España, coa Medalla ao Mérito do Traballo en 2014, da Cámara de Comercio e dos seus compañeiros empresarios, de cuxas organizacións sempre foi partícipe, como de ANFACO, coa distinción á súa traxectoria empresarial concedida este mesmo ano. Ademais, a conserveira Escurís foi recoñecida coa Medalla da Xunta de Galicia en 1991. Foi tamén distinguido hai unhas semanas pola Deputación da Coruña nos Premios PEL.
