O Concello de Padrón mantén aberto até o 30 de xullo o prazo de inscrición no programa Concilia-Despertares para o curso 2025-2026. Trátase dun servizo municipal dirixido a facilitar a conciliación da vida familiar e laboral das familias durante o calendario escolar, ofrecendo atención ao alumnado no CEIP Rosalía de Castro antes do inicio das clases. O servizo desenvolverase entre o 8 de setembro de 2025 e o 19 de xuño de 2026.
As inscricións poden realizarse ben a través do rexistro de entrada do Concello, ben mediante a sede electrónica. O número total de prazas ofertadas é de 30 fixas e 15 ocasionais.
O programa contempla dúas modalidades de servizo: o servizo básico de gardería e a opción que inclúe tamén o almorzo. No caso das prazas fixas, o prezo mensual será de 40 euros para o servizo de gardería e de 55 euros cando se inclúa o almorzo. Para as persoas usuarias ocasionais, o prezo por día será de 5 euros ou de 8 euros, segundo se opte pola gardería con ou sen almorzo.
A inscrición debe formalizarse no Centro de Servizos Sociais, situado na praza da Igualdade. Tamén se poderá presentar a documentación a través da sede electrónica municipal.
As persoas interesadas poden consultar todos os detalles, incluído o modelo de solicitude e a relación completa de documentos necesarios no documento habilitado en formato PDF. Para calquera dúbida ou aclaración, poden dirixirse ao Centro de Servizos Sociais ou contactar telefonicamente no 981 817 025.
