A Axencia Galega de Doazón de Órganos e Sangue (ADOS) está a desenvolver unha campaña especial para fomentar as doazóns durante o presente verán e, no marco desta campaña, a unidade móbil estará en Boiro os días 17, 18 e 19 de xullo. O alcalde, José Ramón Romero, e o concelleiro, Roberto Lojo, participaron este martes 15 de xullo na presentación da iniciativa xunto con Marisa López, directora de ADOS.
O obxectivo, sinalaron, é fomentar a doazón de sangue durante os meses de verán, nos que é máis complexo manter estable a participación das persoas que doan sangue, e así acadar as 27.000 doazóns que precisan os centros sanitarios neste período para axudar ás persoas que o necesitan.
A unidade móbil estará situada en Boiro, na praza de Galicia, o xoves 17 de xullo de 10.00 a 14.00 horas, o venres 18 de xullo de 10.00 a 14.00 e de 16.00 a 21.00 horas e o sábado 19 de 10.00 a 15.00 horas.
1.389 doantes en 2024
Romero e López salientaron que Boiro é un municipio moi activo en canto a doazóns de sangue. No ano 2024 doaron 1.389 persoas e a taxa foi de 73 doazóns por cada 1000 habitantes, a cifra máis alta da comarca e que supera en 34 puntos a media galega. Gracias á participación de todos os doantes o ano pasado puidéronse axudar a máis de 31.000 doentes nos hospitais galegos.
A Axencia Galega de Sangue, Órganos e Tecidos (ADOS), dependente da Consellería da Sanidade, envía compoñentes sanguíneos as 24 horas do día a todos os hospitais de Galicia para atender a actividade asistencial e facer fronte ás urxencias. Os hospitais galegos precisan máis de 400 doazóns de sangue cada día e dez unidades móbiles percorren os concellos para atender as persoas que desexan realizar este acto altruísta.
