A conselleira de Economía e Industria, María Jesús Lorenzana, visitou este domingo 6 de xullo a tenda pop-up que, por quinto ano consecutivo, abren Artesanía de Galicia e a firma rianxeira D-Due en Sanxenxo durante os meses de xullo e agosto.
Trátase dun escaparate no que se exhiben as coleccións desta marca de moda coas obras de 44 obradoiros de Artesanía de Galicia, que abranguen disciplinas como a cerámica, cestería, olería tradicional, madeira, xoiería, coiro, elaboración e reparación de redes, tecido, encaixe, coitelos, figuras con miga de pan (sanandresiños), gravado, bixutería, complementos, colareiras, estampaxe ou xoguetes.
A Consellería de Emprego, a través da Fundación Artesanía de Galicia, organizou esta nova edición da tenda Summer Shop D-Due & Artesanía de Galicia, que se celebra durante os meses de xullo e agosto na rúa Luis Vidal Rocha, 7, B-D, en Sanxenxo, en horario de 10,30 a 21,30 h, de luns a sábados, e de 11,00 a 15,00 h os domingos. Trátase dunha iniciativa coa recoñecida marca rianxeira de moda D-Due, que busca dar visibilidade ao talento galego e á alta calidade da artesanía feita a man en Galicia, nun espazo compartido cunha firma téxtil con proxección internacional.
D-Due é unha empresa téxtil con orixe no ano 1960, dirixida por Charo Froján e Alfredo Olmedo dende a década dos 90 e con sede en Rianxo. As súas coleccións e creacións artísticas son apreciadas internacionalmente por mercados tan exclusivos coma o xaponés, de feito, contan con tenda propia en Aoyama, unha das zonas comerciais máis exclusivas de Tokio, dende o ano 2015. A difusión internacional de D-due consolidouse ao longo dos últimos anos coa súa presenza nunha ampla variedade das tendas e dos grandes almacéns máis exclusivos de Italia, Francia ou Corea do Sur entre outras cidades clave do panorama da moda mundial.
