Juan Caballero (texto e imaxes). Disputouse a primeira xornada da Regata Ramiro Carregal Rey – Gran Trofeo Faro de Corrubedo, que puntúa para a Copa Galicia de Cruceiros e organizada polo Real Club Náutico de Portosín, coa colaboración do Club Náutico Deportivo de Ribeira. Proba de trazado costeiro entre as rías de Arousa e a de Muros e Noia, con 20,79 millas de distancia. Saída puntual desde as inmediacións da bocana ao porto de Ribeira, cun vento frouxo do noroeste, que era a previsión.
Día moi decisivo para os tácticos, xestionando os bordos, complicados pola falta de fol nas velas e co hándicap dunha mar en contraste e de fondo entre os pasos do Carreiro, Sagres e Corrubedo que nos lle permitía entrar en velocidade.
Numerosos repiquetes para ir axustando o rumbo coa proa mirando cara á entrada na ría noiesa e muradá, onde, á altura do Son situárase a liña de chegada, unha entrada que só puideron executar dous veleiros, o Bon III, de Víctor Carrión, do Club Náutico Punta Lagoa; e o Peperetes-Nortemar, de José Manuel Millán, do Real Club de Regatas de Galicia de Vilagarcía.
O resto da frota, moi dispersa, retirábase ou non lograban completar o percorrido no tempo límite establecido para cada un dos barcos, debido ao seu rating ou coeficiente para Cruceiros ORC.
Ambos os veleiros, o de Carrión e o de Millán, compiten na mesma División, polo que o Bon III, fíxose con esta primeira proba, seguido do Peperetes-Nortemar. O tempo empregado foi de algo máis de 6 horas.
Este domingo disputarase, polo menos, unha manga técnica tipo barlovento-sotavento, sendo intención do Comité da Ramiro Carregal Rey o incluír unha segunda proba, todas elas no interior da ría de Arousa. Para as Divisións de Cruceiro/Regata e Cruceiro, será empezar a Carregal de cero, ao non puntuar. Ao seu termo celebrarase a entrega de premios coa asistencia confirmada en Ribeira de Ramiro Carregal.
