O Partido Popular de Ribeira emitiu un comunicado no que responde, di, ás recentes declaracións do alcalde, Luís Pérez Barral, nas que aseguraba que a remodelación da praza dos Estudantes estará rematada “ao longo do verán” e que a obra non está paralizada, senón que a empresa distribúe aos seus operarios “como considera oportuno”. No comunicado o PP lembra que a obra foi adxudicada en maio de 2024 cun prazo de execución de seis meses, “polo tanto debería estar finalizada no outono pasado, e non ao longo deste verán, como agora afirma o rexedor”. A realidade, sinalan, “é que nos últimos meses foron numerosos os días nos que non houbo actividade ningunha na obra, e esta mesma semana só había tres operarios traballando no lugar”. E engaden: “Non se pode aceptar que se tente maquillar este atraso evidente. A empresa adxudicataria está obrigada a cumprir os prazos do contrato e a presentar certificacións mensuais sobre o avance da obra, algo que a día de hoxe non se ten producido nin unha soa vez”.
A voceira popular, María Sampedro, sostén que “dende o PP de Ribeira consideramos que o argumento de que a empresa reparte os operarios entre distintas obras non xustifica en absoluto a inactividade prolongada na praza dos Estudantes”. Móstrase crítica tamén, co feito de que “o Goberno local non sancione con firmeza a outras empresas por incumprimentos contractuais e agora pretenda xustificar este caso con escusas pouco críbeis”.
Sosteñen ademais que “non existe ningún documento oficial que declare a paralización formal da obra nin consta tampouco o inicio de expediente de penalización contra a empresa adxudicataria, como sería procedente ante o evidente incumprimento dos prazos e obrigas do contrato” e pregúntanse “cal é a razón pola que o Goberno local non está a actuar neste caso con rigor e transparencia, como si proclama facer noutras ocasións”.
