O núcleo do Pazo, en Rianxo, vai celebrar esta vindeira fin de semana as súas Festas na Honra do Santo Antón. Haberá tres xornadas de festa: dende o venres 6 de xuño até o domingo 8.
A axenda inclúe oficios relixiosos, música e baile tradicional da nosa terra, verbenas e actividades para a rapazada.
O programa comezará o venres 6 de xuño ao mediodía co estoupido das bombas de palenque que anuncian o comezo das festas. Pola noite, haberá verbena no Camiño con Marbella (que actuará de xeito continuado até as 2.00 horas da madrugada) e cos DJ Chocolate e Tito Maverick,
O sábado 7 de xuño comezará coas bombas de palenque e coas dianas e alboradas do grupo de gaitas Buxaina. Polo serán haberá ruada coa charanga Furruxa e pola noite verbena con The Cuncas e Magos.
O domingo tamén abrirá coa alborada de Buxaina e ás 12.30 horas está previsto o paseo do Santo Antón, acompañado pola banda de gaitas. Ás 13.00 celebrarase unha misa campestre cantada pola Coral Abraira.
Pola tarde haberá festa para a rapazada con Pazolandia, nas leiras do Pereiro, onde haberá inchábeis acuáticos con piscina para todas idades. Polo serán, ás 20.00 horas, celebrarase a Festa da Escuma.
