O Coliseo Noela acollerá este venres 13 de xuño, ás 19:00 horas, unha sesión solemne da Academia Xacobea na que ingresarán tres académicos de honra e unha académica correspondente.
Os honorarios son Luís Rodríguez Ennes, catedrático emérito de Dereito Romano e Sistemas Xurídicos Comparados na Facultade de Dereito de Ourense; Benedict Buono, profesor titular e director do Departamento de Filoloxía Clásica, Francesa e Italiana na USC; e José Antonio Ballestero, maxistrado e vogal do Consello Xeral do Poder Xudicial. A académica correspondente é a maxistrada canaria Reyes Martel Rodríguez, maxistrada do Xulgado de Menores nº 1 de As Palmas de Gran Canaria e fundadora do proxecto de integración social #UP2U Project “Depende de ti”, que cada ano peregrina con mocidade a Compostela.
Tras a toma de posesión proxectarase O Camiño Esquecido, un documental da Asociación de Concellos do Camiño da Ría Muros Noia que recolle as evidencias patrimoniais, históricas e documentais sobre a historia e o trazado desta ruta. Nuria de León, recoñecida arpista e cantante, porá o broche musical á xornada. Previamente, ás 17:00 horas, os académicos serán recibidos oficialmente no Concello de Noia e farán unha visita guiada á Igrexa de San Martín (18:30 horas).
E para o sábado 14 de xuño queda a xornada O Camiño de Santiago na Ría de Muros Noia, que se celebra a partir das 11:00 horas no salón do Antigo Casino de Noia. Esta xornada técnica comezará con catro relatorios: a arqueóloga Manuel Pérez Mato falará sobre a Igrexa de San Martín de Noia; o arqueólogo Mario César Vila presentará unha análise histórica e arqueolóxica do Camiño da Ría de Muros Noia; o escritor Antón Pombo disertará sobre a experiencia da peregrinación por este itinerario; e o director xerente da Asociación de Concellos do Camiño da Ría de Muros Noia, Sebastián Valverde, explicará por que Galicia precisa da declaración de novos Camiños de Santiago desde unha perspectiva de xestión pública e de turismo.
Ás 12:30 horas terá lugar unha mesa redonda sobre os retos e perspectivas do Camiño da Ría de Muros Noia con Santiago Freire, presidente da Asociación de Concellos do Camiño da Ría de Muros Noia; Marcelino Agís, presidente da Academia Xacobea; e os mencionados Antón Pombo e Sebastián Valverde.
