O Concello de Ribeira asinou este xoves 19 de xuño un protocolo de colaboración co Consello da Cultura (CCG) co obxectivo de “promover cultura de maneira conxunta”: actividades de primeiro nivel que terán a súa sede en Santa Uxía. O acto de sinatura protocolario foi realizado polo alcalde de Ribeira, Luís Pérez Barral e a presidenta do Consello da Cultura Galega, Rosario Álvarez, que estiveron arroupados polo tenente de alcalde, Vicente Mariño, e por Marcelino Fernández, xerente do Consello da Cultura.
O rexedor agradeceu a boa disposición da presidenta do CCG, Rosario Álvarez, para que “Ribeira poda acoller actividades culturais de primeiro nivel“. Luís Pérez destacou que o Goberno local quere potenciar a lingua galega, a cultura, e tamén “facilitar xornadas formativas dirixidas a toda a veciñanza, con independencia da súa idade ou da súa formación académica”. Barral puxo en valor a oportunidade desta colaboración que redundará en máis actividades “que relancen esa cultura propia do noso país”. Por último falou do importante que é crear alianzas que permitan sumar sinerxías positivas “para que Ribeira poda despuntar no eido cultural e formativo”.
Pola súa banda, Rosario Álvarez, salientou que a cultura non só é cultura humanística senón que tamén cultura científica, cultura tecnolóxica, “polo tanto son moitos os paus que nós tocamos”. Álvarez apelou a que “a cultura é un dereito para todas as persoas, sen ningún tipo de factor de exclusión”.
Primeiras liñas de actuación: memoria e patrimonio marítimo
A presidenta dixo que Ribeira é un sitio idóneo para ser a capital da recuperación da cultura marítima de todo o patrimonio material e inmaterial de Galicia. “De feito, nós queremos comezar esta colaboración cunha xornada de cultura marítima o vindeiro 3 de xullo, dedicada aos oficios do mar poñendo o foco nos carpinteiros de ribeira e nas redeiras e redeiros”, sinalou.
A colaboración mutua terá unha programación conxunta de actividades culturais e faranse actividades de formación nas áreas de historia, lingua, literatura, ciencias sociais, etc. tamén haberá espazo para cursos, publicacións, conferencias, concertos e coloquios de interese mutuo, intercambio de publicacións, traballos de investigación, intercambio e colaboración de todo tipo de proxectos culturais de interese común, elaboración, edición e distribución de materiais didácticos, de divulgación, formativos e recuperación de fondos documentais.
Como remate, o alcalde convidou á presidenta a asinar no libro de ouro do Concello de Ribeira e agasallou dous libros; un da historia de Ribeira e outro sobre o fillo predilecto Manuel Ayaso.
