Noia vai acoller este verán unha nova edición do seu Campus do Emprendemento e do Saber, impulsado polo Concello e a fundación FUNDHSGA coa colaboración da Xunta e a Universidade de Santiago. Desenvolverase entre xuño e setembro e inclúe “un programa cheo de contidos actuais e de interese para todos públicos”, segundo avanza a organización.
Haberá, máis polo miúdo, xornadas sobre Intelixencia Artificial, saúde mental, educación emocional, adicións, mediación escolar, creación literaria ou deporte.
A inscrición é de balde e pode facerse de maneira independente para cada xornada. Podemos achegar os nosos datos persoais a info@fundehsga.com ou a través do número 981 576 666.
O programa dará comezo o 14 de xuño no Casino de Noia, ás 11.00 horas, con O Camiño de Santiago na ría de Muros e Noia. Proseguirá o 26 de xuño cunha xornada sobre Intelixencia Artificial, no Casino, a partir das 10.00 horas. A saúde mental e a física centrará as tres seguintes charlas: o 2 de xullo (ás 19h no Club de Pensionistas), o 7 de xullo (ás 19h no Club de Pensionistas) e o 12 de xullo (no Casino de Noia ás 10.00 horas). O 17 de xullo será a quenda dunha charla sobre educación emocional (ás 10h no Casino) e o 24 de xullo o programa seguirá cunha cita sobre violencia escolar (no Casino de Noia ás 10h).
O programa prosegue o 31 de xullo cunha xornada sobre adicións, no Casino ás 10h.
En setembro, o día 6, falarase de creación literaria no Casino de Noia ás 10h.
O 11 de setembro desenvolverase a charla Noia a horta da ría, na Confraría ás 10h.
O 18 de setembro conclúen as actividades con A Noia que queremos, no Casino ás 10h.
