Este venres 6 de xuño o Auditorio Municipal de Rianxo vai acoller ás 21.00 horas un espectáculo teatral declarado de interese cultural pola cidade de Bos Aires. Estamos a falar de Galego, unha peza teatral de Gabriel Fernández e Javier Molina.
Fillo e neto de galegos, Gabriel Fernández interpreta neste monólogo a un migrante galego na Arxentina xa moi maior, que desprega a súa memoria nun presente que o volve a interpelar: a súa relación distante co outro espazo —o da orixe— e a referencia do construído no país que o acolleu.
Un ancián, só, nun espazo que non lle pertence. Un falar galego cruzado polo acento arxentino. Unha vida enteira sobre os ombreiros e moito que dicir. Galego propón a viaxe dun home que deixou a súa terra en busca dun futuro mellor e que, sen apenas decatarse, foi tecendo un pasado cargado de silencios, afectos e ausencias.
