O presidente honorífico de Actemsa, Severino Escurís Batalla, foi distinguido este xoves coa Medalla ANFACO 2025 á traxectoria empresarial, nun acto celebrado en Vigo tras a Asemblea Xeral de ANFACO-CECOPESCA. A medalla foi entregada polo presidente da Xunta, Alfonso Rueda, como recoñecemento a “unha vida enteira dedicada ao desenvolvemento do sector conserveiro galego”.
O evento congregou a máis de 150 asistentes, entre os que se atopaban o presidente do Parlamento galego, Miguel Santalices; o delegado do Goberno en Galicia, Pedro Blanco; o conselleiro do Mar, Alfonso Villares; a conselleira de Medio Ambiente e Cambio Climático, Ángeles Vázquez; e a vicepresidenta da Deputación de Pontevedra, Luisa Sánchez.
A organización destacou a figura de Severino Escurís como “un pioneiro con vocación industrial e capacidade de liderado, cunha traxectoria iniciada en Conservas Escurís, empresa familiar da que partiu para fundar Actemsa”. A súa contribución foi clave na diversificación do sector conserveiro e na creación de emprego e riqueza, converténdose, segundo ANFACO, “nun referente de traballo, coherencia e visión a longo prazo que inspirou a varias xeracións”.
Escurís, que cumprirá 100 anos este verán, recolleu o galardón acompañado polo seu fillo Juan Carlos Escurís, conselleiro de Actemsa. Este agradeceu a distinción sinalando que “é un dos recoñecementos máis importantes, porque reflicte o cariño e admiración que lle tedes no sector”.
Durante o acto tamén foron recoñecidos:
- O Ministerio de Agricultura, Pesca e Alimentación, na categoría institucional.
- A conselleira Ángeles Vázquez, como personalidade pública destacada.
- Pola súa traxectoria profesional, Josefa Lago (traballadora de Carlos Albo), María Saturna Tubío (Jealsa) e Carmen Abuín (Conservas Friscos).
As Medallas ANFACO recoñecen cada ano a aquelas persoas, entidades e institucións que deixan pegada na cadea mar-industria, contribuíndo ao seu desenvolvemento, innovación e sostibilidade.
