O Pavillón Deportivo de Santa Irene en Porto do Son vai dar acollida esta fin de semana ao acto oficial de clausura das Escolas Deportivas Municipais. A cita será este sábado 31 de maio a partir das 18.00 horas. En concreto, pecharase oficialmente o curso das escolas de taekwondo, bailoterapia, predeporte, acrobacias, baile moderno, zumba, boxeo e patinaxe.
Os cursos comezaron o pasado mes de setembro e leváronse a cabo en diferentes localidades do municipio.
Estas Escolas Deportivas teñen o obxectivo de achegar hábitos deportivos e saudábeis a toda a poboación abranguendo diferentes rangos de idade, desde sénior ata público infantil. En total, esta edición 2024-2025 das Escolas Deportivas municipais ofreceron á veciñanza unha ampla axenda de actividades tales como predeporte, taekwondo, bailoterapaia, acrobacias, baile moderno, mantemento de maiores, pilates, cross training, biking, total training, zumba, atletismo, boxeo, patinaxe, ioga e circuit training.
Desde o Goberno local celebran “a gran acollida que tivo esta edición das Escolas Deportivas Municipais entre a veciñanza” e destacan “a gran variedade desta programación que ten como principal obxectivo apostar polo deporte da nosa vila, favorecer a organización e conciliación das familias, así como as relacións sociais dos nosos maiores”.
