O concelleiro de Benestar Social, Pepe Lijó, xunto coa Concelleira de Persoal, Magdalena Pérez e a Psicóloga municipal, Cristina Fontaíña, celebraron esta semana a clausura das actividades da nova edición do Obradoiro de Memoria organizado polo Concello de Porto do Son. Os edís felicitaron ás veciñas e veciños participantes pola súa implicación no obradoiro e polos bos resultados acadados, e tamén deron os parabéns ao persoal encargado de impartir as actividades.
Os obradoiros foron impulsados pola Área de Benestar Social do Concello e ían orientados a persoas maiores de 55 anos dos diferentes núcleos do termo municipal. Incluíron actividades de traballo, participativas e creativas para mellorar a calidade de vida das veciñas e veciños das parroquias e para mitigar e combater o deterioro cognitivo asociado á idade.
