O BNG e A Marea de Noia xuntaron forzas para impulsar a mellora do Paseo Marítimo. Indican as agrupacións que “despois de que o pleno do Concello aprobase na sesión celebrada o pasado 24 de abril unha proposta para rexeitar o actual proxecto de pavimentación en asfalto da explanada de Labarta e promover a redacción dun novo proxecto técnico que contemple unha transformación integral, sostíbel e de calidade do Paseo Marítimo, vimos de esixir a Portos de Galicia que cumpra co acordado pola Corporación”.
A iniciativa foi presentada conxuntamente polos voceiros do BNG, Ricardo Suárez, e da Marea de Noia, Manolo Seijas, e contou co apoio da maioría da Corporación, malia as reticencias expresadas polos grupos do PP e de NO.I.A., que se abstiveron.
A proposta destaca “a importancia estratéxica da explanada de Labarta como punto de conexión entre o núcleo urbano e o litoral”, e critica que “o actual proxecto centrado en usos viarios e de estacionamento supón unha perda de oportunidade para recuperar este espazo como lugar de encontro cidadán e pulmón verde da vila”.
Entre os puntos aprobados inclúese a redacción dun novo proxecto paisaxístico integral que aposte por conexións peonís coas zonas de Barro, Testal e o centro urbano; o uso de pavimentos permeábeis e materiais respectuosos co medio; a incorporación de vexetación nativa; así como a creación de novos usos sociais e de lecer.
Tamén se acordou estudar alternativas para o estacionamento noutras localizacións, como os arredores da Piscina Municipal, con integración paisaxística e ambiental.
O pleno acordou ademais acometer a peonalización do Paseo Antón Avilés de Taramancos, mantendo o acceso para servizos e mobilidade reducida, co obxectivo de reforzar a integración entre o paseo marítimo e a zona de Labarta. Segundo se acordou na sesión plenaria, a actuación realizarase este ano e con fondos do remanente ou do orzamento local. Por último, a proposta inclúe a apertura dun proceso participativo para que a veciñanza achegue ideas e propostas sobre o deseño e uso deste espazo estratéxico.
