O vindeiro mes de xullo o concello de Noia acollerá, por terceiro ano consecutivo, o Congreso Internacional en Odontoloxía.
Os días 4 e 5 de xullo, máis de 200 profesionais chegados de Galicia, de toda España e mesmo doutros países, aprenderán e compartirán coñecementos con grandes referentes do sector.
Trátase, en palabras da organización, dun evento clave para seguir impulsando a excelencia clínica e a innovación na profesión.
Contarase coa presenza de relatores de renome internacional como o doutor Sidney Kina e o doutor. Lucio Kanashiro, ademais dunha conferencia inaugural sobre a integración da Intelixencia Artificial na odontoloxía, a cargo do doutor Luis Gayán de Ayala, da Clínica Universidade de Navarra.
O congreso terá lugar no Teatro Coliseo Noela, e incluirá tamén momentos sociais, como unha cea no Liceo e unha comida tradicional galega con espectáculo. Toda a información sobre o programa e a inscrición está dispoñíbel en www.endogal.es.
O evento vén da man do Consello Galego de Odontoloxía e o ICOEC e conta coa colaboración do Concello de Noia.
