O Concello de Boiro colabora coa Cruz Vermella de Boiro na III Andaina Solidaria Camiño do Ouro, prevista para o vindeiro domingo 25 de maio. O alcalde, José Ramón Romero, participou este venres 16 de maio na presentación da proba xunto con Julio García e Natalia Romero da Cruz Vermella de Boiro.
A proba solidaria celebrarase o 25 de maio con saída ás 10.30 horas da praza de Galicia cun percorrido longo de 9 quilómetros que pasará polo Pazo de Goiáns, o esteiro do río Coroño, o paseo marítimo e o paseo do río Breiro. E tamén unha adaptación curta de 5 quilómetros.
O presidente de Cruz Vermella, Julio García, agradeceu a colaboración para levar a cabo esta andaina que “busca recadar fondos para os proxectos sociais que desenvolvemos dende a Cruz Vermella de Boiro á vez que facemos un percorrido por lugares emblemáticos de Boiro”.
O prezo das inscricións é de 10 euros e poden facerse en liña ou na oficina da Cruz Vermella no Centro Social. O alcalde, José Ramón Romero, animou á veciñanza a participar nesta “cita solidaria coa que podemos desfrutar na nosa paisaxe. A veciñanza de Boiro sempre amosa a súa solidariedade implicándose neste tipo de iniciativas”.
