CONGALSA, empresa de referencia na elaboración de solucións de alimentación conxelada, con sede principal na Pobra do Caramiñal, estará presente na Seafood Expo Global, o evento comercial máis importante do mundo dedicado ao sector do mar, que se celebra ata o 8 de maio en Barcelona. A compañía acode a esta cita internacional para presentar as súas últimas novidades e reforzar a súa posición como un dos actores clave no mercado dos produtos do mar conxelados, cunha proposta baseada na calidade das materias primas, a innovación e a seguridade alimentaria.
A participación na Seafood Expo Global conta coa presenza de todo o equipo comercial e de compras neste evento clave para o sector, no que, segundo lembra CONGALSA, danse cita os principais actores internacionais da industria dos produtos do mar.
“Este é o maior escaparate do mundo para os produtos do mar e unha cita clave para mostrar ao mercado internacional quen somos e que facemos”, sinalou Julio Simarro, conselleiro delegado de CONGALSA, poñendo o foco na relevancia deste evento para as empresas do sector e salientando que “vimos co obxectivo de seguir consolidando a nosa posición como unha empresa de referencia que traballa no desenvolvemento de produtos que faciliten o día a día dos nosos clientes, sen renunciar ao sabor, a tradición e a excelencia nas materias primas”.
Apuntou Simarro que a presenza de CONGALSA nesta feira supón “unha oportunidade estratéxica” para o grupo, que volve poñer de manifesto a súa capacidade de adaptación ás tendencias do mercado e o seu compromiso co desenvolvemento de solucións aliñadas coas necesidades dos consumidores e do sector dos produtos conxelados.
Entre as novidades que a empresa presenta en Barcelona destacan algúns dos seus últimos lanzamentos, pensados para ofrecer novas alternativas dentro do catálogo de produtos do mar conxelados como son as anillas á andaluza, o frito mixto ou a espetada de lura patagónico e lagostino. Tamén haberá espazo para presentar innovadores produtos como pasteis de bacallau ou mini samosas de pito ao curry.
