A Consellería de Educación vén de publicar os gañadores do VII Concurso de Podcasts-Radio na Biblio, que convoca o dito departamento da Xunta en colaboración coa Radio Galega. Oito centros educativos da Baña, Bueu, Cospeito, Ferrol, Laza, Malpica de Bergantiños, Vedra e Vilagarcía de Arousa álzanse cos galardóns deste certame, que nesta edición está dedicado ás cantareiras e á poesía popular oral, ás que se lle rende homenaxe co gallo do Día das Letras Galegas 2025.
Deste xeito, a través destes traballos homenaxéase a Adolfina e Rosa Casás Rama (Cerceda), Eva Castiñeira Santos (Muxía), e Prudencia e Asunción Garrido Ameixenda e máis Manuela Lema Villar (as tres Pandeireteiras de Mens, en Malpica, falecidas hai máis dunha década), e rememórase á literatura de base popular, sempre unida á música como tesouro patrimonial colectivo.
Os centros participantes presentaron un podcast en lingua galega cunha duración de entre tres e cinco minutos, que podía ser unha entrevista, unha cuña publicitaria, un espazo de noticias, un faladoiro, un recital, un debate ou un programa monográfico, entre outros. O contido debía versar sobre aspectos bio-bibliográficos das mulleres homenaxeadas, a importancia e representación das cantigas populares, a relación entre a literatura e a música e a muller na literatura galega ou as mulleres nas Letras Galegas.
A continuación damos conta dos centros e traballos galardoados
Educación Infantil
Laza, CEIP O Castiñeiro, O noso son
1º e 2º de Ed. Primaria
Ferrol, CEIP Plurilingüe San Xoán de Filgueira, por Esas voces que resoan
Vedra, CEIP Ortigueira, por Eco do pasado
3º e 4º de Ed. Primaria
Bueu, CEIP Plurilingüe da Torre- Cela, Sabichón 2P2 e os misterios. O mundo das cantareiras
5º e 6º de Ed. Primaria
Malpica, CEIP Milladoiro, por A nosa herdanza
1º e 2º de ESO
Cospeito, CPI Plurilingüe Virxe do Monte, por Cultugal
3º e 4º de ESO
A Baña, CPI de San Vicente, por As Letras cantan, e A Baña tamén!
Outras ensinanzas
Vilagarcía de Arousa, CEE de Vilagarcía de Arousa, por Cantareiras: voces e tradición
Cada un deles recibe unha asignación de 1.250€ para melloras no laboratorio/emisora de radio ou para actividades relacionadas co funcionamento deste laboratorio de radio, sempre vinculado á biblioteca do centro. Os traballos premiados serán emitidos por Radio Galega e serán difundidos a través de Agalegaaudio.gal. Podían participar neste concurso os 220 centros públicos que forman parte do programa Radio na Biblio da Consellería de Educación, Ciencia, Universidade e FP, así como outros centros que traballan co laboratorio de radio como ferramenta pedagóxica.
