A Consellería de Medio Ambiente e Cambio Climático, a través de Augas de Galicia, está a levar a cabo labores de conservación e mantemento en oito tramos de río que suman preto de 20 quilómetros nos concellos de Rois e Padrón.
Estas actuacións inclúen a retirada de árbores caídas e biomasa presente nas canles fluviais para evitar atoamentos, así como a roza selectiva de zonas de acceso e a eliminación de especies exóticas invasoras. Os traballos estenderanse durante arredor de 25 semanas e desenvolveranse mediante ferramentas manuais, motoserras e rozadoiras, ademais do apoio de maquinaria de maiores dimensións.
Na primeira fase, os esforzos céntranse en máis de 12,2 quilómetros do río Sar ao seu paso por distintas parroquias destes municipios. Outras intervencións destacadas abarcan 1,5 quilómetros no rego de Tarrío, 1,4 quilómetros no río Rubial e diversos treitos menores en regos como Estramundi, Agra de Lamego, Avelenda e Castrelo.
Estas accións forman parte do programa de mantemento e mellora do dominio público hidráulico das bacías de Galicia-Costa, incluíndo zonas de alto risco potencial significativo de inundación (Arpsi). O obxectivo final é optimizar os leitos fluviais e mellorar as condicións naturais do ecosistema, garantindo a fluidez das augas nos tramos intervidos.
Máis información: Xunta de Galicia.
