Nas últimas semanas e dentro da actual plan de medidas para mellorar a vixilancia do lecer nocturno en Santa Uxía, poñendo o foco (principalmente) no barrio de Bandourrío (onde se atopa a gran maioría dos establecementos con licenza para abrir de noite), a Policía Local de Ribeira, intensificou o control dos horarios dos locais hostaleiros. Ao abeiro deste labor, os axentes levantaron tres actas por distintos incumprimentos da hora límite de peche. Os axentes lembran que o consumo de bebidas alcólicas na vía pública non está permitido, “polo cal os locais non poden favorecer este consumo permitindo a saída dos clientes con vasos de cristal e tampouco ofrecer vasos de plástico na súa substitución”.
Nas vindeiras semanas incidirase máis nestes comportamentos, engadiron.
A intensificación destas tarefas de vixilancia responde en boa medida ás queixas da veciñanza, que leva anos sufrindo graves problemas de ruído vinculados ao ocio nocturno. Tras unha xuntanza recente cos residentes, o alcalde Luís Pérez Barral indicou que se está a realizar “un control exhaustivo para garantir que os locais de hostalaría cumpren cos horarios de peche”. Amais, intensificouse a vixilancia sobre o consumo de bebidas alcohólicas na vía pública.
