O Goberno local de Ribeira mantivo este martes 29 de abril unha xuntanza participativa coa veciñanza do barrio de Bandourrío, co obxectivo de escoitar as súas preocupacións e trasladarlles as medidas que se están a adoptar para mellorar a convivencia na zona. As principais demandas veciñais centráronse na necesidade de incrementar a presenza policial para combater a drogadicción e reducir os ruídos derivados do ocio nocturno.
Na xuntanza participaron o alcalde, Luís Pérez Barral, e os tenentes de alcalde Vicente Mariño, Francisco Suárez e Xabier Vidal. Durante o encontro, Pérez Barral detallou as actuacións que se van poñer en marcha para dar resposta ás peticións da cidadanía.
En materia de seguridade, o rexedor informou de que a presenza efectiva da Policía Local verase reforzada na zona co obxectivo de disuadir actos vandálicos e delitivos e garantir unha mellor convivencia. Así mesmo, sinalou que o Concello está a traballar no ámbito social para ofrecer alternativas ás persoas con problemas de drogadicción mediante a intervención da Unidade de Condutas Aditivas e dos educadores de rúa. Ademais, o Goberno local trasladará á Delegación do Goberno a necesidade de reforzar a presenza da Policía Nacional no barrio, solicitando un incremento de patrullas que contribúan a mellorar a seguridade cidadá.
En relación cos problemas de ruído vinculados ao ocio nocturno, o alcalde indicou que se está a realizar un control exhaustivo para garantir que os locais de hostalaría cumpren cos horarios de peche. Amais, intensificarase a vixilancia sobre o consumo de bebidas alcohólicas na vía pública.
No eido da vivenda, informouse que o Goberno local ten a intención de facerse con inmóbeis que se atopan sen uso co fin de destinalos a vivenda pública, favorecendo así o acceso á vivenda digna e combatendo o abandono de edificios. Neste sentido tamén emprazáronse ámbalas dúas partes a colaborar para evitar que vivendas sen uso poidan ser usurpadas. A reunión produciuse nun “clima cordial e moi positivo”, sinalaron fontes do Goberno local, engadindo que o Concello traballa “para revitalizar Bandourrío, como barrio orixinario da vila e apostando por seguir mantendo unha comunicación fluída coa veciñanza e por dar respostas concretas ás demandas”.
