O Concello da Pobra volverá ofrecer este verán visitas organizadas ao Parque Nacional Marítimo-Terrestre das Illas Atlánticas de Galicia, nunha iniciativa presentada pola concelleira de Turismo, Estefanía Ramos. A edila puxo en valor a riqueza natural do entorno afirmando que «non é preciso ir moi lonxe para atopar lugares de gran riqueza».
O programa inclúe seis rutas repartidas entre os arquipélagos de Cíes, Ons e Sálvora. As datas previstas son: Cíes (29 de xuño e 7 de setembro), Ons (27 de xullo e 10 de agosto) e Sálvora (20 de xullo e 23 de agosto).
A última das visitas a Sálvora, o 23 de agosto, destaca pola súa proposta nocturna. A saída inclúe unha observación astronómica grazas á condición de destino Starlight da illa, con regreso previsto ás 00:30 horas. Durante a actividade, os participantes poderán gozar das estrelas guiados por unha persoa especializada en astronomía.
As rutas diúrnas inclúen o traslado en barco e unha visita guiada polos distintos espazos das illas. Para participar, é necesario reservar a través do teléfono 986 320 048 ou da web da navieira Piratas de Nabia.
Durante a presentación, a directora da navieira, María Jesús Acuña, animou a reservar con antelación, xa que “as prazas adóitanse esgotar con rapidez”. Con esta iniciativa, o Concello da Pobra aposta por un turismo sustentable e de calidade, promovendo o coñecemento e goce dos espazos naturais máis emblemáticos de Galicia.
