O Concello da Pobra do Caramiñal, a través da súa área de Turismo, organiza por cuarto ano consecutivo unha ruta turística guiada pola contorna do río das Pedras, un espazo de grande riqueza natural, histórica e cultural. A iniciativa, segundo destacou a concelleira de Turismo, Estefanía Ramos, ten como obxectivo “poñer en valor un dos principais atractivos paisaxísticos do municipio”.
A actividade desenvolverase este sábado, 17 de maio, e incluirá un percorrido a pé de aproximadamente dous quilómetros, cunha duración estimada de tres horas. A dificultade da ruta é media-alta, polo que está recomendada para persoas maiores de 12 anos.
Ao remate do itinerario, os participantes serán trasladados en autobús ata o miradoiro de Valle-Inclán, situado na montaña da Curota, desde onde poderán desfrutar dunha das panorámicas máis emblemáticas da comarca.
O punto de encontro será o aparcadoiro fronte á oficina de turismo, ás 10:00 horas, desde onde partirá un autobús ata o inicio da ruta.
A actividade ten un custo de 15 euros por persoa e conta con prazas limitadas, polo que é necesaria inscrición previa. As persoas interesadas poden inscribirse presencialmente na oficina de turismo – Casa Mariñeira (no parque do Castelo), ou ben a través do correo electrónico turismo@apobra.gal ou dos teléfonos 671 090 262 e 687 482 835. O prazo de inscrición remata ás 13:00 horas do venres, 16 de maio.
