Este 12 de abril imos ter unha nova función enmarcada na primeira Mostra de Teatro Amador Nicolasa Añón, organizada pola Asociación Terra de Outes en colaboración coa Área de Cultura do Concello de Outes. Trátase da función Moito ruído e poucas noces, a cargo de Teatro Carauta. A cita será este sábado na Casa da Cultura de Outes, ás 20.00 horas. Trátase da última das funcións da primeira edición da mostra. Dende o Concello salientan que “considerando o éxito de público que tiveron as sesións enmarcadas nesta convocatoria da Mostra, agardamos repetir o ano vindeiro”.
Moito ruído e poucas noces é unha versión da obra do mesmo título de William Shakespeare, artellada polo Grupo Carauta Teatro (San Pedro, Santiago) e dirixida por Xurxo Barcala.
Nesta obra relátase como, tras anos de dura competencia no mercado, as corporacións de Solorzabal International e Navia Operaciones comezan un proceso de fusión empresarial. Durante o proceso de negociación, Claudia e Hipólito, fillos dos máximos accionistas, inician unha relación que rematará en voda. Unha vez na celebración do casamento, un evento de máximo nivel, comezarán a aparecer pequenos problemas do pasado que poñerán en perigo a realización do mesmo.
