A Consellería do Mar acordou en marzo co sector unha parada biolóxica en abril e unha veda de polbo durante dous meses. Neste período, o Servizo de Gardacostas de Galicia, dependente, xa comisou 1.290 cacharros e preto de 350 quilos de polbo (347,25). Concretamente, a incautacións producíronse na enseada e pantaláns de Cariño, na zona de Arousa Norte e nas rías de Muros-Noia, A Coruña e de Vigo, así como na praia de Arnela e o porto de Caión.
Trátase do seguimento que este ente autonómico realiza de xeito periódico, coa finalidade “de frear a captura de especies ilegais, ben sexa por non cumprir coa talla regulamentaria, por proceder da extracción irregular ou porque o seu transporte non cumpre os requisitos de documentación ou conservación”.
A parada biolóxica e a veda son medidas técnicas que recolle o plan do polbo, co fin de axustar a xestión pesqueira ao ciclo de vida da especie e así protexer a súa reprodución e contribuír a unha explotación sostíbel deste recurso pesqueiro. Así, neste período, queda expresamente prohibida a captura deste cefalópodo, por medio de calquera arte, en augas nas que Galicia ten competencias en marisqueo, xa sexan interiores ou exteriores. Polo tanto especifícase que “as embarcacións dedicadas á súa captura con nasas deberán retiralas do seu calamento e levalas a porto, cousa que tamén é aplicábel á pesca marítima de recreo e á pesca con calquera outra arte distinta da nasa para polbo”.
Unha das novidades respecto ao último plan é que a paralización da actividade extractiva no mes de abril contará con apoio económico ao sector afectado ao abeiro do Fondo Europeo Marítimo, de Pesca e Acuicultura (FEMPA) que ampara a posibilidade de habilitar estas axudas á paralización temporal para aplicar medidas de conservación como os períodos de descanso biolóxicos dos recursos aparece recollida no regulamento deste fondo. Realízase para favorecer as condicións de vida e traballo das persoas que se dedican a esta actividade e para impulsar o desenvolvemento da actividade de xeito sustentábel.
Outros comisos
En canto ás incautacións doutras especies destacan, principalmente, 116,25 quilos de centola na zona da Ría de Arousa; 81,5 quilos de choco nas rías de Vigo, Aurosa e de Ares-Betanzos e na zona de Cariño; 64,5 quilos de centola nas rías de Arousa e de Ares, e na zona costa de Cedeira; 53 quilos de robaliza, 21 quilos de raia mosaica e 20 de rodaballo na costa de Cedeira; e 18 quilos de lubrigante no porto de Mugardos, na ría de Arousa e Ares-Betanzos.
Asemade, en canto a aparellos de pesca, comisáronse unha embarcación tipo planeadora de 6 metros de eslora e 1 motor fóraborda, no porto de Rianxo; 83 pezas de trasmallos, nas rías de Vigo e de Arousa, en Sada e en Cariño; 49 nasas nas rías de Arousa, A Coruña e Muros-Noia, e nas zonas de Caión, Camelle e Cedeira; e 9.360 metros de miños, de palangrillo e de palangre de fondo, en Cedeira, entre outros.
O total de comisos deu lugar a un total de 26 presuntas infraccións. Polo que respecta, ás especies incautadas todas foron devoltas ao mar.
