A Comisión Executiva Federal do PSOE resolveu este martes a expulsión definitiva de José Antonio Caamaño, edil de Outes, tras apoiar unha moción de censura no seu Concello sen autorización da organización. A decisión, asinada polo secretario de organización Santos Cerdán León, conclúe que as alegacións presentadas por Caamaño non desvirtúan os feitos nin contradín a súa autoría.
Segundo o informe do instrutor, as alegacións foron consideradas “innecesarias e impertinentes”, destinadas a dilatar o proceso sen achegar probas determinantes. Ademais, o documento detalla que o edil foi notificado en múltiples ocasións da apertura do expediente, tanto por burofax como por correo electrónico, polo que se descarta a súa alegación de indefensión.
Contra esta resolución, Caamaño poderá presentar recurso ante a Comisión Federal de Ética e Garantías do PSOE no prazo de dez días hábiles.
Bernardo Fernández Piñeiro, secretario xeral do PSdeG Provincial da Coruña, subliñou que a decisión de Caamaño de apoiar a moción de censura do PP foi tomada sen consulta nin aprobación das instancias superiores do partido, nin da agrupación local. “Por todo isto, é un tránsfuga e resulta lóxica e normal a súa expulsión do Partido Socialista”, afirmou Fernández Piñeiro.
