O Concello de Boiro presentará o vindeiro venres 11 de abril ás 20.00 horas no Pazo de Goiáns os resultados do proxecto O que nos conta o mar de Arousa, unha iniciativa mediante a que se recolleu información con persoas vinculadas ao mar e ao territorio e que deu como resultado a realización de catro contos ilustrados destinados a público infantil.
Este proxecto desenvolveuse en varias partes, por un lado a recompilación de información de persoas vinculadas ao mar e ao territorio para o deseño das personaxes que dan identidade aos contos; a segunda parte foi a elaboración das catro obras literarias que teñen distintas temáticas como o cambio climático, a contaminación mariña, sobrexploación do medio mariño e pesca selectiva e responsábel.
Este traballo deu como resultado a publicación de catro obras para a súa divulgación en colexios e bibliotecas para a súa difusión acompañadas de materiais didácticos para poder traballar sobre elas; unha iniciativa contribúe a recuperar o patrimonio cultural e a talasonimia propia da ría de Arousa e a difundilos entre as novas xeracións
Este proxecto desenvolveuse mediante unha subvención da Consellería do Mar para proxectos ao amparo das estratexias de desenvolvemento local e participativo EDLP, aprobadas aos grupos de acción local do sector pesqueiro (GALP) no marco do Fondo Europeo Marítimo, de Pesca e Acuicultura 2021-2027 dun importe de 44.668,90 euros.
