A Concellería de Cultura de A Pobra programa para este venres 4 de abril a inauguración da exposición de pinturas titulada “A vida entre dúas terras”, da artista Karin Kuijper. O evento terá lugar na Casa da Cultura Raquel Fernández Soler ás 20:00 horas e contará coa actuación musical do grupo Barahúnda.
Karin Kuijper, nacida en Utrecht (Países Baixos), é unha pintora autodidacta que vive dende hai anos en Rianxo. Apaixonada pola arte dende a infancia, adícase á pintura de maneira constante dende 2012. Co seu estilo naíf, cheo de cor e fantasía, Kuijper plasma en acrílico escenas dos costumes tanto holandeses como galegos, como romarías, barcos, peixes, xardíns e flores. Ademais, nas súas obras adoita incluir ás súas mascotas, Chula e Bribón.
A artista comezou a expoñer en 2014 e, desde entón, o seu traballo foi gañando recoñecemento. A exposición permanecerá aberta durante todo o mes de abril, de luns a venres, en horario de 11:00 a 13:00 e de 17:00 a 20:00 horas.
