O Concello de Muros deu a coñecer hoxe a novena edición do duatlón ‘Eleuterio Balayo’, que terá lugar o vindeiro sábado 5 de abril. O evento, consolidado no calendario deportivo galego, será tamén escenario do Campionato Xunta de Galicia Supersprint nas categorías cadete, xuvenil e júnior. Ademais, haberá unha proba popular na modalidade Sprint.
Os horarios das probas serán ás 14:45 e ás 17:00 horas. “Unha proba que sempre ten moi boa acollida e que serve como recoñecemento ao noso veciño Eleuterio Balayo, gran apoio do deporte en Muros”, subliñou a alcaldesa María Lago. Pola súa parte, o concelleiro de Deportes, Damián Torea, destacou a relevancia da competición: “Un ano máis, Muros será a capital do duatlón galego, con máis de 300 persoas inscritas nas dúas modalidades.”
O concello tamén quixo expresar o seu agradecemento a todas as entidades implicadas na organización, como o departamento municipal de Deportes, a Brigada de Obras Municipal, Protección Civil de Muros, GES, Garda Civil e Policía Local.
O duatlón ‘Eleuterio Balayo’ promete ser unha cita deportiva imperdible para todos os amantes do deporte na rexión.
