O auditorio do Centro Cultural e Xuvenil de Muros acolle este sábado 12 de abril a celebración do Día do Circo con Petit Cabaré de Pistacatro. Será a partir das 18.00 horas, con entradas a un prezo de catro euros. Trátase dunha función recomendada para todos os públicos, de 75 minutos de duración aproximadamente.
O Día do Circo chega a Muros por segundo ano consecutivo da man de Pistacatro, compañía galega galardoada co Premio da Cultura Galega nas Artes Escénicas 2023. Petit Cabaré é unha auténtica festa circense que reúne a artistas excepcionais nun espectáculo vibrante, cheo de maxia, humor e moita enerxía. Nesta ocasión, o evento contará cun mestre de cerimonias de luxo: Antón Coucheiro, recoñecido pallaso e improvisador, que converterá esta celebración nunha experiencia única e irrepetible.
A concelleira de Cultura, Caridad González, destacou: “O Día do Circo foi un dos espectáculos mellor valorados o ano pasado, e esta edición promete superar todas as expectativas. Será unha oportunidade marabillosa para gozar en familia dunha arte tan especial como o circo.”
