A subdelegada do Goberno na Coruña, María Rivas, e a delegada da Xunta, Belén do Campo, visitaron este luns 7 de abril o CEIP de Outes, acompañadas polo alcalde Fran Calo, con vistas a coñecer de primeira man os proxectos que levan a cabo en materia medioambiental, impulsados polo profesorado en colaboración directa (e totalmente participativa) cos 261 alumnos cos que conta o centro educativo.
Belén do Campo destacou o afán de “divulgación e concienciación ambiental desde as aulas” que afianza a este centro como “un referente de boas prácticas educativas” e trasladou os seus parabéns aos rapaces así como a todos os docentes polas numerosas iniciativas que poñen en marcha cada ano, moitas delas recoñecidas con premios importantes como o primeiro Premio Innovagal da Xunta á innovación pedagóxica en 2024, co que a Xunta de Galicia pon en valor o esforzo que fai o centro por desenvolver enfoques didácticos innovadores que melloran a calidade do ensino e aprendizaxe para o alumnado durante os últimos 4 cursos. Ademais, participa nos programas do Club de Ciencias e Meteoescolas do Plan Proxecta.
“Este centro”, sinalou a delegada, “aposta por fomentar o benestar emocional do alumnado e a sostibilidade, e tendo isto en conta, usa unha metodoloxía de aprendizaxe activa e dinámica, centrada no respecto ao medio ambiente de forma transversal”. Por estas e outras razóns, lembrou, foi seleccionado na convocatoria de Centros Referentes do Plan MEGA de mellora educativa de Galicia, cun proxecto ao redor dos obxectivos de desenvolvemento sostíbel e participa en programas como PINEA da asociación ADISBISMUR (Asociación de Persoas con Discapacidade da Bisbarra de Muros) cun proxecto Interxeracional de contido medioambiental, entre outras moitas iniciativas neste eido.
Pola súa banda, a subdelegada do Goberno na Coruña, María Rivas, felicitou á comunidade educativa do CEIP Plurilingüe de Outes polo “seu compromiso coa economía circular e o coidado do medio ambiente”, que, segundo lembrou, “valeulle o recoñecemento do Ministerio de Educación como un dos 10 centros educativos máis sustentábeis de España”.
María Rivas aproveitou para coñecer da man da directiva e da ANPA do centro os distintos programas que vén desenvolvendo nos últimos anos neste ámbito. Así, tivo ocasión de coñecer iniciativas como a renaturalización de patios, a xestión dos residuos nas merendas, as patrullas ambientais ou a horta ecolóxica. María Rivas apuntou que a sustentabilidade “é un obxectivo compartido por este Goberno, que fai do respecto polo medio ambiente un eixo transversal das súas políticas”. Tamén incidiu no feito de que este recoñecemento, o único de Galicia, fóra a parar a Outes, un concello no que o Goberno, a través da Fundación Biodiversidade, está a promover a renaturalización do río Tins e a recuperación para a cidadanía do seu tramo urbano, cun investimento de máis de 850.000 euros.
