Preto de 300 veciños e veciñas, maiores de sesenta anos, participaron este domingo na V Xuntanza de Maiores do Concello de Lousame, celebrada no restaurante O Trapeiro. Este emotivo encontro contou coa presenza da alcaldesa de Lousame, Teresa Villaverde Pais, quen estivo acompañada por Jacobo Rey, director xeral de Familia, Infancia e Dinamización Demográfica, así como outros representantes municipais.
Entre os asistentes destacaron membros do equipo de goberno como Silvia Agrafojo, concelleira de Servizos Sociais; Esteban Ares, de Economía; Ramón Martínez, de Obras; Mariel Agrafojo, de Deportes; e José Antonio Ces, de Protección Civil. Tamén participaron os voceiros do PSOE, Juan Prego, e do BNG, Anxo Moledo.
A alcaldesa Teresa Villaverde agradeceu a asistencia dos maiores, subliñando que o evento busca homenaxear a este colectivo e fomentar a convivencia entre os veciños e veciñas do municipio. “Temos un concello moi disperso e esta é unha forma de que teñan un día de convivencia”, afirmou.
O encontro consolidouse como un referente na vida social de Lousame, promovendo a interacción e a conexión entre os seus habitantes máis veteranos.
