Este sábado 5 de abril, ás 20.30 horas, o auditorio do Centro Cultural e Xuvenil de Muros vai dar acollida á función Nabiza Girl II: O extraño caso da cultura minguante, a cargo da contadora, humorista e monologuista Isabel Risco. O prezo será de 3,00 € e o público recomendado de máis de 13 anos. A duración da función é de aproximadamente 70 minutos. As reservas poden facerse na rede a través do documento habilitado.
Isabel Risco preséntanos de novo á superheroína máis irreverente de Galicia: Nabiza Girl, a nosa loitadora do rural, que regresa ao ataque con “máis forza, máis humor e máis ganas de dalo todo”, adianta, engadindo que nesta nova aventura, terá que enfrontarse a inimigos insospeitados para loitar contra a desaparición da cultura. A concelleira de Cultura, Caridad González, subliña que “a peza Nabiza Girl II promete facer reflexionar ao público ao tempo que garante unha noite de risas.”
