O Concello de Noia, a través da Concellería de Cultura, e a Asociación Pura Raza Cabalo Galego, compartiu o programa da nova edición das Festas San Marcos, unha das celebracións máis agardadas na nosa contorna e que darán comezo o 25 de abril. Como relataban na presentación Pepe Pérez, concelleiro de Cultura e Xacobo Pérez, presidente asociación Pura Raza Cabalo Galego, a convocatoria 2025 dos festexos contarán “cun programa lúdico e cultural, con concertos, música tradicional, a histórica feira cabalar e de maquinaria agrícola e moitas outras actividades”. O cartaz deste ano foi realizado por Santiago Avilés.
A continuación damos conta do programa punto por punto:
Venres 25. O venres 25 as festas arrincan ás 10.00 horas coas tradicionais bombas de palenque e dianas e alboradas a cargo do grupo Cherumia (Sociedade Liceo Noia). A continuación dará comezo a Feira Cabalar e de Maquinaria Agrícola en San Lázaro, con concursos morfolóxicos, a presentación de exercicios e doma alta (Escola de Cabalos de Pura Raza galega), os Concursos de Andadura (Galega Serrada e Galega Chapeada), o Concurso Premios Especiais e a presentación do cabalo lusitano e de equitación portuguesa. Ao mediodía (ás 12h) celebrarase unha misa solemne e unha procesión en Santa Cristina de Barro, ás 17h será a quenda dos xogos populares para a rapazada do Campo da Feira e ás 21h está prevista a actuación, na rúa do Curro, de La Gramola e Boomers. Ás 21.30 horas haberá verbena na Alameda a cargo de Finisterre e logo da medianoite actuará Disco Móbil CDC.
Sábado 26. O sábado as festas darán comezo ás 10.00 horas coa tirada das bombas de palenque e unha ruada da Banda de Música de Noia, que ofrecerá un concerto na praza da Constitución ás 13h. Pola tarde haberá inchábeis para a rapazada a partir das 17.00 horas na praza do Curro. Ás 18h está previsto un torne de boxeo e kickboxing no Pavillón Agustín Mourís. Ás 22h haberá verbena na Alameda con Panorama City. Ás 23 tamén haberá música no Tapal con Black Cat e a música volverá á Alameda ás 0.30 horas con Chocolate Disco Móbil.
A festa do domingo 27 comezará novamente con bombas de palenque e dianas e alboradas, desta volta a carto do grupo Os Salgueiriños. Ás 11h celebrarase a oitava edición da foliada de San Marcos de grupos tradicionais con Canlebó, Nunca é Tarde, Cherumia, Falcoeira, Jaitas Blue, Club de Pensionistas de Noia, Ébora e Os Salgueiriños. Haberá ruada e actuacións en distintas prazas de Noia. Ás 13h está prevista unha reunión dos grupos de música tradicional galega na Alameda (con actuación) e polo serán, ás 20h, está programado un concerto na praza do Curro a cargo da banda de música tradicional galega Leirabuxo. Ás 20.30h, volverá a verbena a Alameda con New York.
