O sábado 5 de abril celébrase en Rianxo en diferentes emprazamentos unha xornada para honrar ás madriñas republicanas que axudaron, tralo estoupido da contenda da Guerra Civil no 1936, aos presos políticos do campo de concentración de Rianxo.
A cita está organizada pola Comisión pola Recuperación da Memoria Histórica do Barbanza e o Concello de Rianxo coa colaboración de Nova Escola Galega.
A xornada comezará ás 11.00 horas no dito campo de reclusión onde se inaugurará un monumento ás madriñas. Participarán Carlos Cimadevila, presidente da Comisión pola Recuperación da Memoria Histórica do Barbanza, Dolores Rodríguez Sende, madriña republicana, Ricardo Cávila, escultor, Soledad Agra, responsábel de Dereitos Civís da Deputación da Coruña, e Julián Bustelo, alcalde de Rianxo.
A xornada proseguirá a partir das 12.00 horas no Auditorio de Rianxo, cun relatorio e cunha mesa redonda (A investigación da memoria histórica con perspectiva de xénero) na que participarán Aurora Marco, Montse Fajardo e María Fernández.
A vertente musical do acto correrá a cargo de Bernal Muíños e o grupo local Barahúnda.
A xornada rematará ás 14.30 horas cun xantar de confraternidade para o que cómpre formalizar a inscrición (avisar ante deste mércores 2 de abril a través da conta de correo crmhbarbanza@gmail.com ou o teléfono 676 919 660).
Como lembraremos, máis de dous milleiros de presos, na súa maior parte asturianos, foron recluídos pola ditadura franquista no campo de concentración de Rianxo, onde malia as moitas adversidades que alí viviron, tiveron o apoio das que se coñecen como “madriñas republicanas”, que lles levaban roupa e comida e lles facían arranxos nas poucas prendas coas que contaban.
O campo de concentración do Castelo, en Rianxo, foi un recinto de reclusos de longa duración. Situado nunha fábrica de salga pertencente á familia Goday, chegou a ter unha capacidade de 2.000 prisioneiros. Operou, polo menos, entre outubro de 1937 e decembro de 1939. O seu lugar ocúpao hoxe unha urbanización.
