A Asociación Cultural Barbantia, o xornal La Voz de Galicia e o Concello de Ribeira organizan este venres 25 de abril unha nova presentación literaria: a presentación do libro Paspartue, do escritor, músico e enxeñeiro informático coruñés Alex Pernas.
A cita será ás 20.30 horas no salón de actos do Centro Cultural Lustres Rivas de Ribeira. Intervirán, xunto co autor, Encarna Pego, vicepresidenta de Barbantia, Milagros Torrado, secretaria de Barbantia, e Luís Pérez Barral, alcalde de Ribeira. Na cita tamén será presentado o suplemento cultural A Voz de Barbantia número 204, que sairá á rúa o sábado 26 de abril xunto con La Voz de Galicia.
Alex Pernas desenvolve a súa carreira coma enxeñeiro de software. No ámbito cultural formou parte de varias formacións musicais, estando na actualidade na banda de metal Oymyakon. A obra Paspartue é o seu cuarto libro, despois da publicación da novela Xarfas e dos libros de relatos A Paga e De entre as tebras.
Sinopse de Paspartue
A primeira vez que naceu fíxoo nun primeiro de xaneiro.
Ás cero horas, cero minutos, e cero segundos, viu por primeira vez a luz o primeiro dos Paspartues.
O primeiro dunha estirpe maldita, escrava dun lúgubre destino.
Esta é a historia dunha obsesión, dunha fixación enfermiza por outra alma, por outro ser ao que perseguirá ao longo dos anos e das vidas. Un relato atroz no que o renacer está ligado á repetición, e no que os propios froitos da maldición serán os que propicien que o pesadelo nunca teña fin.
