O pasado 4 de abril a Parroquia de San Martiño de Noia compartiu a súa programación da Semana Santa, axenda na que destacan novamente as oito procesións tradicionais desta histórica celebración da vila noiesa. As confrarías das Dores, Nazareno, Resucitado e Terceira Orde Franciscana únense coa parroquia de San Martiño para conformar a programación. O cartel deste ano inclúe unha fotografía de Claudio Álvarez, o noiés gañador do concurso de fotografía organizado con motivo desta celebración.
A principal novidade deste ano será a estrea dun paso infantil no que participará (o Xoves Santo, na Procesión de Carracas) unha ducia de nenos.
O venres 11 de abril polo serán (ás 20h) comeza de xeito oficial a Semana Santa noiesa, coa misa en honra da Virxe das Dores para continuar coa procesión.
O 13 de abril, Domingo de Ramos, será a quenda da bendición de palmas, que se realizará ao mediodía na praza do Tapal, para seguir logo cun desfile liderado por unha borriquita. Na tarde do Domingo de Ramos celebrarase a procesión do Ecce Homo, que partirá de San Francisco e rematará cunha misa pechada co pregón. O dito pregón correrá a cargo de monseñor Julián Barrio, arcebispo de Santiago de Compostela.
O mércores 16 de abril levarase a cabo pola noite o vía crucis ás 21.30 horas a procesión do Cristo da Misericordia.
O Xoves Santo, 17 de abril, estará protagonizado pola celebración da Cea do Señor e máis pola comitiva das Carracas, que percorrerá a vila ás 20 horas. Como dixemos, as celebracións do Xoves Santo introducirán unha das principais novidades da Semana Santa de Noia: a estrea do Paso do Neno Xesús da Paixón, formado por rapaces e rapazas de entre 4 e 10 anos.
O venres 18 de abril, Venres Santo, a axenda abrirase pola mañá (sobre as 10.30 horas) co Santo Encontro no Curro e proseguirá polo serán co Desencravo e a Procesión do Santo Enterro e a Soidade, a partir das 20 horas.
O sábado 19 de abril levarase a cabo a Vixilia Pascual. A data de peche da Semana Santa noiesa será o domingo 20 de abril, Domingo de Pascua, na que se celebrará unha última procesión, a do Resucitado, sobre as 11.00 horas, con saída da capela de Santo Bernardo e chegada a San Martiño. Posteriormente celebrarase a Misa de Pascua.
