Finalmente e logo de terse adiado a festa fixada para o 8 de marzo por mor do mal tempo, o Campo de Pazos de Taragoña (Rianxo) vai ser o escenario este sábado 15 de marzo, a partir das 16.30 horas, da celebración do Entroido 2025 de Taragoña.
A axenda inclúe inchábeis, obradoiros, xogos, desfiles, concurso de carrozas (premios aos tres mellores), unha gran verbena do Entroido, concursos, actuacións musicais e sesións DJ. Organiza a Asociación Cultural Campo Maneiro – Comisión de Festas de Taragoña.
O programa comezará ás 17.00 horas na carpa habilitada no Campo de Pazos. O desfile de carrozas, que inclúe premios en metálico para as tres mellores, dará comezo á devandita hora (logo da concentración de carrozas no adro da igrexa ás 16.30 horas) coa saída da comitiva entroideira até o Campo de Pazos. A vertente musical correrá a cargo de Estróupele e Lusco & Fusco.
Polo serán, ás 20.00 horas, comezará o concurso Tara-GotTalent, presentado por Román Castaño e cun xurado de luxo, no que cada participante deberá mostrar o seu talento máis oculto e optar ao premio de até 300 euros.
Pola noite haberá verbena da man de Fussion & Curi e Soundivan.
