Ribeira deu este 19 de marzo un novo e relevante paso en materia de fomento da innovación social. Fíxoo impulsando un Laboratorio de Transformación Cohesiva para reducir as desigualdades e reforzar a cohesión local. O Eixo Atlántico lidera este modelo pioneiro no marco da Axenda Urbana 2030, no que traballa conxuntamente co Concello de Ribeira e Deusto Cities Katedra.
Na presentación do laboratorio estiveron presentes o rexedor ribeirán, Luís Pérez, o segundo tenente de alcalde, Francisco Suárez-Puerta, a concelleira de Cultura, Antía Alberte xunto con Xoán V. Mao, secretario xeral do Eixo Atlántico e Roberto San Salvador, autor do informe e experto da Universidade de Deusto.
Segundo explicaron, o laboratorio ten como obxectivo deseñar, implementar e avaliar un modelo de gobernanza máis democrático, inclusivo e cohesivo. A través dunha serie de sesións de traballo con representantes políticos, técnicos, empresas, asociacións e cidadáns, búscase reducir as brechas de vulnerabilidade e desigualdade na contorna. Deste xeito, proponse un modelo de políticas sociais personalizadas e innovadoras para fomentar a equidade e a integración de todos os colectivos sociais.
Nas distintas fases do proceso, que inclúen mesas de traballo e actividades participativas, abordaranse temas clave como a igualdade de xénero, a inclusión social, o acceso á vivenda e o benestar da mocidade. Búscase transformar as políticas actuais cara a un modelo máis próximo ás necesidades individuais, superando as barreiras da exclusión social, sinalaron, engadindo que “ a través da experiencia piloto en Ribeira, están a construírse as bases para un ecosistema de innovación transformadora que non só mellorará as políticas locais, senón que tamén servirá de modelo replicábel para outras localidades do Eixo Atlántico”.
O rexedor explicou que este proxecto reflicte o compromiso de Ribeira coa Axenda Urbana 2030, promovendo un desenvolvemento sostíbel, inclusivo e centrado nas persoas.
Ribeira2029: preocupacións da mocidade
O Fórum da Xuventude Coesa, celebrado o 24 de xaneiro de 2024 en Ribeira, tamén serviu como punto de partida para a reflexión sobre o futuro do municipio no marco da iniciativa Ribeira2029. Durante as sesións, os mozos e mozas participaron activamente na construción dun escenario para a Ribeira do futuro, onde compartiron as súas aspiracións e desafíos para os próximos anos. Na súa visión da cidade para 2029, destacaron a necesidade dunha urbe con máis oportunidades laborais, especialmente para a mocidade, cun forte sentido de identidade e cohesión social.
Os participantes expresaron o seu desexo de que Ribeira se converta nun referente cultural, un lugar vibrante cunha oferta diversa de actividades que enriquezan a vida comunitaria. Na súa proposta, tamén subliñaron a importancia de “reducir a dependencia do autoemprego, fomentando un entorno empresarial máis dinámico e con empresas que ofrezan empregos estábeis e de calidade”. Ademais, na súa visión de futuro, os mozos e mozas avogaron por un municipio máis verde, con máis espazos públicos que fomenten a interacción social e a vida saudábel.
Pérez Barral agradeceu ao secretario xeral do Eixo Atlántico e a Roberto San Salvador, autor da publicación que se fixo directamente en Ribeira xunto con outros concellos de Portugal. “Hoxe o que estamos presentando son as conclusións dunha experiencia piloto que se desenvolveu na nosa cidade de maneira participativa e de forma coordinada cos sectores sociais locais e tamén cos propios sectores administrativos do Concello de Ribeira”, salientou, engadindo que é a primeira vez que se fai algo así en Ribeira; o de implicar a sectores sociais activos da nosa cidade e as áreas gobernamentais de diferentes ámbitos.
“Cando se fala de cohesión social sempre focalizamos nos Servizos Sociais, pero temos que darnos conta que hoxe en día a poboación presenta múltiples casuísticas e dende o concello detectamos perfectamente que había que facer un traballo de forma coordinada entre todos os departamentos que ten o concello para chegar a facer de Ribeira un sitio mellor para vivir e para traballar”, sinalou Luís Pérez.
