O temporal Martinho azouta a nosa terra con forza e as consecuencias xa se deixan notar dende onte. Por exemplo na Pobra do Caramiñal, onde os bombeiros do Parque Provincial de Ribeira interviñeron ao redor das 18:15 horas de onte, mércores 19 de marzo, na retirada dun poste e cables de teléfono que foran derribados por un vehículo pesado e que entorpecían o tráfico rodado na intersección das rúas Alexandre Bóveda e Rafael Dieste, no concello da Pobra do Caramiñal. Os bombeiros procederon a levantar os cables, retirar o poste de madeira e a sinalizar con cinta o lugar no que caera, quedando a estrada aberta ao tráfico de novo. Completou o operativo a Policía Local da Pobra do Caramiñal.
Por outra banda, os bombeiros do Parque Provincial de Ribeira foron alertados na mañá deste 20 de marzo pola caída dunha árbore que interrompía na AC-305, en Palmeira, no concello de Ribeira. Os bombeiros provinciais encargáronse de retirar a árbore da vía.
Ademais de todos os operativos devanditos, os bombeiros do Parque Provincial de Ribeira tamén tiveron que participar na mañá deste xoves 20 de marzo na retirada dunha estrutura metálica con risco de caer á rúa en Castiñeiras, no concello de Ribeira.
