O presidente de CONGALSA, Luis Miguel Simarro, e a directora xeral da empresa, Noela Prieto, recibiron este 31 de marzo, nas instalacións da empresa alimentaria da Pobra do Caramiñal (no Polígono da Tomada) ao delegado do Goberno en Galicia, Pedro Blanco, e á subdelegada do Goberno, María Rivas, que visitaron a sede da compañía nun encontro institucional que pon en valor o papel da empresa como referente no sector alimentario e no desenvolvemento económico da comarca do Barbanza.
O encontro incluíu a sinatura no libro de honra da compañía, un percorrido polas distintas áreas produtivas e unha reunión de traballo na que se abordaron asuntos de interese común vencellados ao desenvolvemento industrial.
Durante a xornada, o delegado do Gobierno tivo a oportunidade de coñecer de primeira man o modelo de produción de CONGALSA, a súa aposta pola innovación, a sustentabilidade e a internacionalización, así como os proxectos estratéxicos en marcha.
“Para nós é unha honra recibir ao delegado do Goberno e poder compartir con el o noso traballo diario, os nosos valores e os nosos retos de futuro”, destacou Luis Miguel Simarro, presidente de CONGALSA, engadindo que “somos unha empresa firmemente comprometida con Galicia, coa creación de emprego de calidade e co desenvolvemento dun modelo industrial respectuoso co medio ambiente e innovador”.
Pola súa banda, o delegado do Gobierno puxo á empresa de Barbanza como exemplo da experiencia, coñecemento e capacidade innovadora da industria transformadora do mar en Galicia. “CONGALSA leva moito tempo facendo as cousas ben, apostando por un modelo de calidade xerador de riqueza e que proxecta os nosos alimentos por todo o mundo”, asegurou durante a súa estadía na empresa da Pobra, no transcurso da cal trasladou aos responsábeis da firma o compromiso do Goberno e do ministro Luís Planas de “seguir traballando na promoción dos produtos do mar para elevar o consumo entre a cidadanía”.
Doutra banda, o delegado destacou o apoio do Ministerio de Agricultura, Pesca e Alimentación ao conxunto do sector agroalimentario en Galicia e o impacto dos PERTES do Plan de Recuperación “que están a permitir mellorar a competitividade, a rendibilidade e a sustentabilidade das nosas empresas”. Deste xeito, animou ao tecido empresarial galego a presentar os seus proxectos innovadores e “aproveitar a oportunidade histórica que ofrecen estes fondos do Executivo español para responder, xuntos, aos retos actuais e futuros da industria pesqueira”.
A visita institucional reforza o papel de CONGALSA como unha das compañías líderes do sector da alimentación conxelada en España e unha firme vocación de crecemento responsábel.
