A Igrexa de Santa Comba e o Cemiterio de Rianxo acolleron este domingo 23 de marzo unha homenaxe a Teresa Castelao, irmá do histórico debuxante, escritor e político Alfonso Daniel Rodríguez Castelao. A homenaxe encadrouse na celebración do 25 cabodano de Teresa Castelao. Na cita estiveron presentes representantes da nosa cultura e do noso ámbito político, como o secretario xeral de Lingua, Valentín García, ou o alcalde rianxeiro Julián Bustelo.
A lembranza consistiu nun oficio relixioso que acolleu a igrexa de Santa Comba e nunha ofrenda floral na sepultura na que Teresa repousa canda a outra irmá, Josefina, no camposanto rianxeiro. Os actos foron organizados polo Partido Galeguista no marco da celebración do Ano Castelao e neles participaron tamén o secretario xeral do Partido Galeguista, Francisco López; o herdeiro de Afonso Daniel Rodríguez Castelao, Javier Baltar, e o párroco Marcelino Sánchez. O acto contou coa colaboración do Concello e das entidades galegas de Alén Mar de Arxentina e Uruguai.
Falecida con máis de cen anos, Teresa foi durante décadas o nexo de unión de Castelao coa súa familia, con Rianxo e con Galicia. Foi presidenta da Fundación Castelao dende 1984, data da súa creación, até a súa morte hai 25 anos.
