As persoas interesadas en participar poden facer a inscrición a través da web de CONGALSA ou de Deporticket
A IX Andaina Solidaria de CONGALSA, que fora aprazada debido ás condicións meteorolóxicas, xa ten nova data: o próximo domingo 6 de abril. Este evento deportivo, aberto a todos os interesados, é unha oportunidade para gozar dunha xornada de deporte, solidariedade e convivencia, mentres se colabora cunha boa causa. A andaina está dirixida a traballadores de CONGALSA, familiares, amigos, entidades colaboradoras, provedores e clientes.
A cita celebrarase de maneira presencial con saída ás 09:30 h* desde a lonxa de Aguiño, en Ribeira. O percorrido terá unha duración aproximada de dúas horas, e a metade de camiño dispoñerase dun punto de avituallamiento. Ao finalizar, os participantes poderán gozar duns petiscos, onde compartir impresións sobre o roteiro realizado.
Para participar, os interesados poden inscribirse a través das webs de CONGALSA e Deporticket. Aqueles que non poidan asistir ao evento de forma presencial, poderán colaborar mediante o “Dorsal 0”. A inscrición require unha achega económica de catro euros* e a entrega de, polo menos, un quilogramo ou litro de alimentos non perecedoiros*.
O obxectivo da andaina é apoiar ás persoas e colectivos en risco de exclusión social na comarca do Barbanza. Os alimentos recadados serán destinados a iniciativas locais como Cáritas e ICE Renovación. Segundo Ana Garrido, xefa de Relacións Externas de CONGALSA, “queremos dar o noso apoio a aqueles que máis o necesitan, colaborando con iniciativas da comarca que prestan apoio social”.
A organización deste evento conta coa colaboración do Concello de Ribeira e a Asociación de Amigos do Camiño de Santiago do Barbanza “A Orixe”*.
Ademais do seu fin solidario, a xornada ofrece a oportunidade de gozar dun percorrido de 10 quilómetros* por unha contorna natural única en Ribeira, accesible para persoas de todas as idades. Para as primeiras 300 inscricións*, entregarase unha camiseta conmemorativa, deseñada polos empregados de CONGALSA e os seus familiares, a través dun concurso de deseño.
CONGALSA anima a todos a participar nesta experiencia que fusiona deporte e solidariedade, promovendo un estilo de vida saudable mentres se apoia a quen máis o necesitan.
