Este venres 28 de marzo comezaron as visitas teatralizadas organizadas polo Museo Municipal de Ribeira que se van desenvolver até o mes de xuño (incluído) tratando a temática das Heroínas de Sálvora e do buque Santa Isabel. A iniciativa vai dirixida ao público infantil e nela participarán os diferentes colexios do municipio.
Este ciclo de visitas inaugurouse este venres 28 coa presenza dos alumnos/as de infantil do CEIP Heroínas de Sálvora de Aguiño que leva precisamente o mesmo nome da exposición a teatralizar. Asistiron tamén a concelleira de Cultura, Antía Alberte e o concelleiro de Mar, Fernando Abraldes.
A concelleira informou que foi unha actividade proposta polo técnico do museo, Miguel Vidal apuntou, “e unha actividade na que están convidadas as escolas do municipio, estamos contactando con elas e incluso de fóra para que veñan, todo con reserva previa para avisar a Cipriana para que nos veña a explicar que pasou aquela fatídica noite do 2 de xaneiro do nao 1921”.
A edil engadiu que “comezamos dende as escolas porque pensamos que dende a nenez temos que transmitir eses valores de arraigamento, e nutrilos da historia do noso municipio”.
Para rematar o concelleiro do Mar agradeceu a iniciativa do Museo Municipal, onde hai unha exposición permanente sobre as Heroínas de Sálvora e o Santa Isabel, e aproveitou para anunciar “que o vindeiro 18 de abril, aquí neste espazo faremos a Homenaxe á Muller do Mar, poñendo o foco este ano nas nosas redeiras”.
Inscricións para a visitas teatralizadas
Tfno. 981.87.35.95 (en horario de 10:00-13:00h).
Correo-e: museo@ribeira.gal
