O Concello de Padrón informa que este luns 10 de marzo remata o prazo para presentar contribucións (textos e fotos) para participar na edición do Libro de Pascua edición 2025. Dende a Administración local fan un chamamento á participación con publicacións creativas que contribúan a que residentes e visitantes poidan desfrutar aínda máis das festas de Pascua. Os textos e fotos deberán ser enviados á conta cultura@padron.gal. A festa, declarada de Interese Turístico de Galicia, celebrarase do 12 ao 27 de abril. Os textos deberán ser enviados en formato Word ou PDF e estar escritos en galego normativo. As imaxes haberá que envialas con formato JPG, PNG ou TIFF, con calidade para imprimir.
O tradicional Libro da Pascua de Padrón sae á rúa coincidindo coas festas máis relevantes da vila. Adoita incluír fotografías de Padrón e da súa contorna, antigas e novas, noticias de actualidade e contribucións xornalísticas ou literarias de autores consagrados vencellados á vila e de promesas das nosas letras.
