O Concello de Noia informou de que os traballos para arranxar os recentes estragos causados pola intensa borrasca do pasado 26 de xaneiro na Piscina Municipal están indo a bo ritmo, e a previsión é que “se todo segue segundo o previsto” nas vindeiras semanas sexa posíbel abrir de novo as portas do inmóbel e poñelo novamente a disposición da veciñanza. O alcalde Santiago Freire e a concelleira Laura Salgado visitaron esta semana o edificio para comprobar o desenvolvemento das tarefas.
Cómpre lembrar que os problemas da Piscina nos que se está a actuar foron causados pola borrasca Herminia que azoutou Galicia (especialmente a costa) con refachos de máis de 120 quilómetros por hora o pasado mes de xaneiro (o día 26, causando numerosas incidencias nunha chea de concellos).
No caso da Piscina Municipal de Noia levou por diante a cuberta e as placas solares. Ao desprenderse a cuberta da estrutura que a suxeitaba os operarios municipais puxéronse mans á obra para apañar todo o material que puidera poñer en risco á veciñanza. Non houbo que lamentar danos persoais.
