A Xunta adxudicou hoxe traballos de mantemento e conservación na ponte da Illa de Arousa, na estrada autonómica PO-307, que une este municipio co concello de Vilanova de Arousa.
A intervención, adxudicada á empresa Tecon S.L. por preto de 50.000 euros, comezará nas vindeiras semanas, sempre que as condicións meteorolóxicas sexan favorables.
Baixo o contrato, trátase de realizar unha actuación de conservación nos apoios das pilas. En concreto, esta obra se executará baixo esta ponte, situada entre os puntos quilométricos 2+642 e 2+2622 da PO-307, polo que non afectarán ao tráfico rodado ou peonil que discorra pola estrada autonómica.
Esta actuación da Consellería de Vivenda e Planificación de Infraestruturas, forma parte do programa que leva acabo a Axencia Galega de Infraestruturas, de inspección de estruturas e obras de paso da Xunta. Neste caso, a última inspección foi realizada neste pasado ano 2024.
En concreto, os traballos a realizar inclúen a substitución dun aparato de apoio de neopreno no estribo 2, e a recolocación doutro na pila 38. Para iso, é necesario a colocación de medios de acceso, montar de equipos de gateo para realizar un levantamento controlado do taboleiro, proceder á recolocación ou substitución do neopreno e aproveitar para realizar saneos puntuais do formigón, e finalmente realizar o descenso controlado do taboleiro. Tamén se prevén pequenas actuacións no taboleiro e nos vanos da ponte.
Cómpre lembrar que a ponte da Illa de Arousa, construída entre os anos 1982 e 1985, foi obxecto dunha profunda reparación entre os anos 2010 e 2015 para corrixir os danos orixinados polos cloruros de orixe mariño e garantir a durabilidade da ponte durante a súa vida útil, que se viu incrementada durante 50 anos cun correcto sistema de inspección e mantemento.
