Un ano máis, o Concello de Noia e a Universidade de Santiago poñen en marcha unha nova edición das xornadas gratuítas Camiños de Coñecemento e Experiencia, encadradas no programa do IV Ciclo da USC e orientadas a formar en diversas materias históricas, culturais ou ambientais ás persoas dos concellos de máis de 50 anos. Segundo explican dende o Consistorio de Noia, as charlas desenvolveranse no Edificio do Casino, en horario de 16.30 a 18.00 horas, ofrecendo “unha oportunidade única para aprender e compartir experiencias”. As inscricións estarán abertas ata o 31 de marzo no primeiro andar da Casa do Concello.
O programa comeza o 1 de abril pola tarde co seminario Historia da fotografía: unha viaxe dende a cámara escura até a area dixital, a cargo de Katia Cino Rouco, investigadora do Departamento de Pedagoxía e Didáctica e colaboradora do Programa Universitario de Maiores da USC. A axenda prosegue o 2 de abril e o 3 de abril coas súas entregas do relatorio Participación social e comunitaria, para que?, a cargo de Iván García, profesor colaborador do Programa Universitario de Maiores da USC. O 4 de abril celebrarase un obradoiro práctico sobre Historia da fotografía, a cargo de Katia Cino; e o 8 de abril será a quenda dunha xornada sobre Especies arbóreas do Barbanza a cargo da profesora Blanca Fraga, que repetirá ao día seguinte, 9 de abril.
