A Asociación de Escritoras e Escritores en Lingua Galega (AELG) celebrou este sábado a súa Asemblea Xeral, onde se adoptaron importantes acordos para o ano en curso.
Entre as decisións tomadas, destacou a elección de Xosé Manuel Beiras como “Escritor na súa Terra – Letra E”, recoñecemento que alcanza a súa trixésima primeira edición. A homenaxe terá lugar en xuño en Santiago de Compostela. Ademais, a escritora palestina Shahd Wadi foi nomeada Escritora Galega Universal para 2025.
Na reunión tamén se aprobou o programa de actividades para este ano, que xa deu comezo coa celebración do Día de Rosalía de Castro. A programación inclúe a continuidade de eventos consolidados como os paseos literarios e os obradoiros da Escola de Escritoras e Escritores da AELG, así como a organización e coorganización de xornadas de formación centradas na creación literaria contemporánea e na formación de novos mediadores da lectura.
Tamén se reforzará o proxecto coordinado pola Sección de Literatura de Tradición Oral coa celebración dunha nova Gala dos Premios Mestres e Mestras da Memoria, unha nova polafía e a XVIII Xornada de Literatura de Tradición Oral no outono. Ademais, terá lugar unha nova edición das Xornadas da Sección de Literatura Dramática.
Outro punto destacado foi a celebración do Encontro Galeusca en 2025. A visibilización das escritoras e escritores a través da web continuará a ser un eixo central da entidade, enriquecendo tanto o espazo común como as páxinas individuais do Centro de Documentación da AELG con novos contidos e entrevistas audiovisuais.
Por último, durante a Asemblea abordouse a análise do impacto da Intelixencia Artificial na creación escrita, tema que será tratado ao longo do ano dentro das diversas iniciativas da asociación.
